جمعة الفرسان الثلاثة

جبران، كارلوس ورياض. جمعة حافلة بالإطلالات التلفزيونية المميّزة. مقابلة 4 ساعات مع جبران باسيل، مؤتمر صحفي ساعتين ونص لكارلوس غصن ومقابلة (وقتها مقبول) مع رياض سلامة. بالحالات التلاتة، البراءة هيي العنوان. جبران انشتم لأن منّو فاسد. كارلوس انحبس لأن بيكرهوه باليابان. ورياض مصرّ إنه الليرة بخير لو صار عندها سعرين صرف. بالمقابل، الحكومة محطوطة أون هولد لأن ما في داعي للهلع، سعر الصرف صار 2400، ما في كهربا وسينما متروبوليس - صوفيل سكرت. ورح بلّش بالأخبار السريعة قبل ما يخلصوا الـ500 كلمة.

هالجمعة، جبرت الناس أحمد فتفت بإنه ينسحب من إجتماع بغرفة الصناعة بطرابلس وإيلي الفرزلي بإنه يفلّ من مطعم بالجميزة.

تاني نهار استضافه طوني خليفة لأن ما بيحبّ هيدي الحركات و«قلّة الأخلاق».

جبران باسيل: إنت جيت عالتايتانيك من بعد ما ضربت بالجليد فما لحقتها.

وإنتو صرلكن 12 سنة عم تتفرجوا عليها عم تغرق.

كارلوس غصن: أنا مرتاح للقضاء اللبناني أكثر من القضاء الياباني.

زياد عيتاني هيك بيقول كمان.

بحث وزير العدل مع السفير الياباني سبل تطوير العلاقات الثنائية بين البلدين خصوصًا على الصعيد القضائي.

أي ووندر عن شو حكيوا.

نبيه بري: «مش على خاطره» سعد الحريري، فتصريف الأعمال واجب دستوري يجب القيام به.

حبيبي يلي متمسّك بالدستور وهوي سكّر مجلس النواب سنة ونص.

نُقِل عن مفتي الجمهورية قوله أنه لن يستقبل الرئيس المكلّف إلا إذا جاء يبلّغه الاعتذار عن التكليف.

سعد مش متمسّك برئاسة الحكومة قد ما المفتي متمّسك فيه.

سعر الصرف بالسوق الحرّة بمطار بيروت صار 1950 ليرة.

بكرا بيستضيف مارسيل غانم محمد زيدان ليبررلنا ليه فاتح دكانة ع حسابه بالمطار.

رياض سلامة: أسهل شي انتقاد السياسة النقدية بلبنان.

مساقبة جسمها لبّيس لأن.

رياض سلامة: لا انهيار ولكن الفقر سيزيد ولبنان بحاجة لدعم خارجي.

عزيزي، شو مفهومك للانهيار؟ وأيمتى رح توقف تشحد؟

الاحتجاجات مكمّلة بالمصارف والمشاكل بين المودعين والموظفين عم تزيد.

معليه بدنا نتحمّل شوي لكان إجت شي دولة عطتنا مصاري متل ما عم يتأمّل رياض سلامة.

نقيب المحامين: جمعية المصارف جهاز نقابي للمصارف ولا تشكّل سلطة دستورية على المودعين.

عم تسألوا شو عملت الثورة؟ جابت ملحم خلف.

قرارين قضائيين هالأسبوع ألزموا المصارف بإعطاء المصاري للمودعين.

ع قبال ما تكتر هيدي القرارات.

ندى بستاني: سنؤمّن الكهرباء بين 8 و10 ساعات خارج بيروت حتى آخر شباط 2020.

بكرا بيزيدوها ع إنجازات العهد.

فادي جريصاتي: التحدّي الأكبر الذي لدينا في لبنان هو إيجاد مطامر.

ولو يا فادي! طول الشط 220 كم إلا ما تلاقوا بعد بحر تطمّوه بالزبالة.

طلب التيار الوطني الحر من جميع الملتزمين والمناصرين مقاطعة كلّ العروض في مترو المدينة.

ومن وقتها صار مترو عم بيكش دبّان.