تعليق ثورة تشرين
جويل بطرس

جمعة مبروك الحكومة

24 كانون الثاني 2020

شكّلوا حكومة من 20 وزير وهنّوا حالن لأن ما أخدت وقت قد يلّي سبقتها. وهنّوا حالن كمان إنو سمّوا 6 وزيرات، بينن أول وزيرة دفاع بتاريخ العالم العربي. طبعاً ما في لزوم نذكّر بإنجازات أول وزيرة داخلية. وبحكومة «سيسرنا بهيدي الحقيبة تنسيسرك بهيديك»، طلال أرسلان يلي عنده 3 نواب، 2 منن مستعيرن من التيار، طلعله وزيرين. حسان دياب ما صدّق ودغري نقل عالسراي وبلّش يحضّر مجلّدات عن رئيس الحكومة حسان دياب. التصريحات الأولى للوزرا الجداد تميّزت بالصراحة. دياب طمنّا إنه رياض سلامة باقي. وزير المال اعترف إنه الليرة رح تضلّ مش بخير، والطاقة أكدلنا إنه ما في كهربا قريباً. ووزير الأشغال شكر "البيك وتيار المردة" لأن سمّوه من ضمن حصّتن. وزير الداخلية، المبسوط بشغل عماد عثمان «الممتاز» حضّرنا نفسياً إنه القمع رح يزيد. وعَ سيرة القمع، تميّز هالأسبوع باستعمال الرصاص المطاطي مباشرة على وجوه الناس. شباب خسروا عيونن، غيرُن خسروا أصابيعن. وتميّز كمان بنوع غاز وسبراي جديد بيبطح دغري عالأرض. بس مش مهم. المهم نوال بري ما تنهار ع بلاط أسواق بيروت. وأخيراً (لأن طوّلت عليكن بس للضرورة أحكام) شهد الأسبوع كمان إطلالة مميّزة لجبران باسيل بدافوس. وبما إنه قربوا يخلصوا الـ500 كلمة، ما رح علّق عالموضوع، كفّيتوا ووفّيتوا.


حسان دياب: سيكون نهج هذه الحكومة المالي والاقتصادي مختلفا كلياً.

ما لحق يخلّص كلمته، طلع وزير المال يقلّنا إنه بدنا نتديّن.

جبران باسيل: سألتيني ليه عم بمثّل لبنان بالمؤتمر. لأن إسمي كان أكتر شي تريندينغ عالسوشيل ميديا.

حبيبي أنا الإنفلوينسر.

كوزيرة مهجرين كيف تخصّصك بالأدب الفرنسي رح يساعدنا بالأزمة؟

كيف نزلت من عكار ع بيروت؟

تطلع فيي رئيس الحكومة وقلّي بالإصبع: إنتِ دايماً بتاخدي حصة الأسد بكلّ شي.

أقوال مأثورة من الإعلام

وزير الاقتصاد: أدعو الحراك لإعطائنا فترة سماح 100 يوم ومحاسبتنا من بعدها.

طب أيمتى رح تعطونا إنتو فترة سماح؟

وزير الداخلية: أنا أثق أنه لن يقبل أي لبناني أن تقف القوى الأمنية مكتوفة الأيدي عند التعدّي عليها.

طب ليه بيوقفوا مكتفين بس السلطة تعتدي ع حقوقنا وأملاكنا العامة والخاصة؟

وزير الطاقة: سأسعى إلى أن آتي بالكهرباء ولكنني لن أعد ولن أحدّد وقتاً.

عزيزي، غود لاك بالأول تأمّن كم ساعة كهربا بس يخلص مخزون الفيول.

وزيرة المهجّرين: أنا مع إلغاء وزارة المهجرين وسأسعى لأكون آخر وزيرة لهذه الوزارة.

هيك قالوا كمان عن وزير المهجرين يلّي سبقك.

بدنا نبني وطن يا وطن. بيكفي وجع وبيكفي سرقة.

يا بموت بالشارع، يا بنحبس، يا بعيش بكرامة.

Vous êtes impolis

أقوال مأثورة من الثورة

ريا الحسن: ليس مقبولاً عدد قنابل المولوتوف والمفرقعات النارية التي ترمى على القوى الأمنية.

إيه لأن كمية قنابل الغاز والرصاص المطاطي يلّي عم تنكب علينا مقبولة كتير للصراحة.

سعد الحريري: استباحة بيروت وأسواقها ومؤسساتها عمل مرفوض ومدان ومشبوه.

عزيزي، في استباحة وحدة لبيروت واسمها سوليدير.

بالأخبار الفنية،

شربل خليل: يلا نتضامن كلنا مع الثوّار اللي نزل دم من منخارن بسبب نكعة، بصورة وهاشتاغ.

وسام حنا: لما بسافر private jet بحط. لما بسافر economy ما بحط.

يوسف الخال: في ناس دفيانة عم تتضيف مغلي وفي ناس بردانة بس هي عم تغلي.

«الحياة مملّة. صحيح تنيناتنا عنّا نفس الوجع. بس التعبير عن الوجع بيختلف من شخص للتاني. أنا موجوع ومجروح. اتركوني».

(اتركوه!، من مسلسل لبناني رصين)

آخر الأخبار

إسرائيل تقصف حلب وتقتل 38 شخصاً، بينهم 5 عناصر من حزب الله
تحرّكات «بالستاين أكشن» تنجح
تراجُع أميركيّ يفتح الباب لاجتياح رفح 
مختارات من الصحافة الإسرائيلية 28/3/2024 
الخارجية الأميركية عن تقرير ألبانيزي: مُقرّرة معادية للسامية
حدث اليوم - فلسطين الخميس 28 آذار 2024