تعليق ثورة تشرين
جويل بطرس

جمعة الكورونا

28 شباط 2020

وصل الكورونا لعنّا من طيارة جايي من إيران. بس طمنونا إنه الجراد مش جايي. موست بروبابلي قال لنفسه «شو بدّي بهالشغلة». وزارة الصحة أعلنت لهلّق عن وجود 3 حالات بمستشفى رفيق الحريري وطبعاً ما حدا بيعرف كم حالة عم تتنقل بيناتنا. وبعد أسبوع على تشريفه، قرّرت وزارة الأشغال تعليق الرحلات بين لبنان وأكتر بلدان ضاربها الفيروس. بهالأسبوع استقبلنا على ما أعتقد 4 طيارات جايي من هيدي البلدان. لكم أن تتخيّلوا التتمّة لهذه القصّة.

بس شو همّنا من الكورونا طالما العهد القوي عطانا أحلى هدية: النفط. نعم يا جماعة! من بعد ما جبران باسيل عمل خطة لتضواية لبنان وإنشاء مترو، بلّش تنقيب عن النفط. هلق مش مهم إذا رح يطلع في نفط بعد 8 سنين متل ما مش مهم إذا صار عنا كهربا أو مترو. المهم النية. والمهم كمان إنه رئيس الجمهورية يلّي بشرنا بالخبرية بخطاب «تاريخي» أكّدلنا إنه «لا طريق للفساد على الثورة النفطية ولا هيمنة لفريق عليها». وبعد هالجملة، بكي نظام المحاصصة من شدّة التأثّر.

لانا مدوّر: في شي غير طبيعي وغير عفوي في طريقة ظهور، انتشار وتطور فيروس كورونا.

مارسيل غانم: أنا أعمل مع مجموعة SGBL وعندي معاشي المحترم من مجموعة SGBL.

أقوال مأثورة من الإعلام

ولأن إلا ما يقوم طائر الفينيق من الرماد، رح نجيب كمان مصاري من الحشيش. اللجان النيابية أقرّت اقتراح قانون زراعة القنّب للاستخدام الطبي وباقي المجلس يوافق عليه. عن جد ما عدنا عارفين كيف رح نلحّق ع كل هالفريش موني. بما إنه مصرياتنا يلّي بالمصارف صار بيطلعلنا منها 50$ بالأسبوع. وبعد ما عرفنا شو رح تعمل الحكومة بخصوص اليوروبوندز. يلي عرفناه إنه دفعت 71 مليون دولار فائدة الدين وهولي دولارات جداد طاروا من حساباتنا. بس حقوقنا ما رح تضيع. الاتحاد العمالي العام رجع عالساحة! بمؤتمر صحفي. طبعا ما حدا عبّره بس المهم عرفنا إنه بعده عايش. ونقابات المخابز والأفران هدّدوا بالإضراب، قام هدّدُن برّي فرجعوا عن تهديدُن. وخلصت الحفلة باستقالة النقيب.

بالـ1616 المير فخر الدين أودع بتوسكانه مبلغ قيمته 111 مليون دولار. اليوم صارت قيمته 5 مليار. تفضلوا روحوا جيبوا المصريات.

مؤتمر دار البيضاء بـ1989 التزم بتقديم 5 مليار للبنان، اليوم قيمتن 20. نحنا ما عنا دين، نحنا سوء تحصيل لأموالنا الموجودة وين ما كان.

أقوال مأثورة لأحد ضيوف الـotv الدكتور دال حتّي

الأسبوع تخلله كمان حفلة استدعاءات جديدة عالتحقيق: شربل الخوري بعد دعوى رفعها عليه مستشار جبران باسيل وديما صادق وجينو رعيدي بعد دعوى رفعها التيار وباسيل. الكلّ ضهر بنفس النهار على الرغم من محاولة توقيف الخوري. يمكن صار لازم نسأل كم محامي مفرّغ باسيل للدعاوى.

عنا مناعة، عنا زبالة بالبلد بتقتل كل البكتيريا يلي بيجوا من برا.

الحب سرّ، مفتاح، passe partout ذهبي بيوصلني عالملكوت.

ما بيهمني هيدي الحكومة، بيهمني إنه يصيح الديك.

أقوال مأثورة لنجوى كرم

وتميّز الأسبوع كمان بالإطلالة الإعلامية الأولى لوزير الاقتصاد راوول نعمه. الزلمي يلي مفروض يكون عنده خطة لحلّ الأزمة فهمانها ع قد ما محمد رعد فهمانها. بس ما تقلقوا، ماغي فرح قالت إنه الحلحلة جايي بنيسان.

1: لو عرفتك من قبل كان أحلى. 2: شو الفرق؟ 1: الفرق إنك مزوجة. 2: بس يمكن الإيام اللي ناطرتنا تكون أحلى. 1: إنت الأحلى.

(عن الوظائف المتعدّدة للحلى، من مسلسل لبناني رصين)

آخر الأخبار

اقتراح قانون شامل لمناهضة العنف ضدّ المرأة
الادّعاء الإسباني يطلب السجن عامَين ونصف لروبياليس 
بلومبيرغ: العمليّات ضدّ الحوثيّين بلا جدوى
صحافي يشكّك بتقرير فرانشيسكا ألبانيزي، وتعابير وجهها تجيب
عمّان تتحرّك ضدّ السفارة الإسرائيليّة لليوم الرابع توالياً  
الجامعة العبرية تتراجع عن قرار الفصل