جمعة الرينغ

كان أسبوع حافل بالمشاعر. إنت منيحة؟ شو حاسّة؟ شو رأيك رح يصير؟ وكان أسبوع حافل بـمسبوطععع ومحبطعععع. وكان أسبوع حافل بالأحداث. الحريري استقال مستعيناً بأقصر خطاب عرفه تاريخ استقالاته. شباب الحزب والحركة اعتدوا على المتظاهرين عفوياً ببيروت. رئيس الجمهورية غيّر فريق الإخراج بالقصر، بس بعد بدّه شغل والإشاعات متلاية الدني. وأخيراً رجعت المسلسلات اللبنانية الرصينة عالشاشات وبعدني مجبورة بـ500 كلمة.


رئيس الجمهورية ألقى خطاب بمناسبة ذكرى انتخابه وعدنا فيه بالانتقال للدولة المدنية وإقرار قانون موحد للأحوال الشخصية ومحاربة الفساد وضمان استقلالية القضاء.

يا ريت فرد مرة طلب من باسيل ما يعرقل توظيف الناجحين بمجلس الخدمة المدنية، واعترف إنه فريقه السياسي ضغط لتعيين قضاة وما عمل أي شي فعلي لمحاربة الفساد غير إنه ردّ القانون ع مجلس النواب.

الحريري استقال فنزلوا شباب تيار المستقبل يحرقوا دواليب. قبلها بكم ساعة نزلوا شباب حزب الله وأمل يضربوا المتظاهرين ببيروت.

كل هيدا ضمن إطار العفوية.

كتلة الوفاء للمقاومة عتلانة هم حرية التنقل ومعتبرة إنه استقالة الحريري رح تضيّع وقت لتنفيذ الإصلاحات وإقرار موازنة 2020.

كأن الجماعة كتير عينن ع الساعة آخر فترة.

الياس بوصعب: استقالة الحريري أتت من دون التنسيق حول ما بعدها وهو ما نعتبره خطأ.

عزيزي، هوي التنسيق المكثف بيناتكن اللي وصّلنا لهون.

مصطفى علوش: الاصطدام كان بسبب غياب جبران باسيل في التشكيلة الجديدة.
بوصعب: ما قاله علوش غير صحيح.

يلا كم يوم ومنعرف إذا «لعيون صهر الجنرال ستين عمرها ما تتشكل حكومة».

الرئيس بري: “المطلوب أن تسود لغة الحوار بين المكونات اللبنانية، خصوصاً انّ صورة الأزمة ليست طائفية أو مذهبية”.

هيي عالأكيد ما كانت هيك لحد ما نزلوا شباب الحركة ع ساحة الشهدا يصرخوا “شيعة شيعة”.

فؤاد السنيورة: “حذار من العودة إلى الوراء وإهدار ما حققته الانتفاضة”.

عزيزي، هوي عالأكيد ما رح نرجع لورا لما يطلعلنا حدا متلك.

أكرم شهيب قرّر يفتح المدارس، رجع سكرها. رياض سلامة قال إنه العملة رح تنهار بكم يوم، رجع سحبها. الحريري عاش صراع بين بدّه يستقيل وما بدّه.

وبيطلعوا يسألوا ليش هالمتظاهرين ضايعين هيك؟

«ماما دوّري القازان. أنا جايي بعد شوي عالبيت»

«ماما، كل كباية رز كبايتين مي أو كل كبايتين مي كباية رز؟»

– «ليش برأيك عكار هلقد محرومة»
«لأنه نحنا قلبنا طيب”»

– «يا عمّ، ما بعدنا حاكيين معك»
العمّ: ما كل ساعة عندي حكي جديد

مجموعة أقوال مأثورة من الثورة.

إعلام التيار ممتعض من «قلة الأخلاق» وهوي ما عم بيلحق تلفيق خبار وتغطية لأخبار «قطاع الطرق» اللي تسبّبوا بـ«إشكال بين الأهالي» امتد من الرينغ لرياض الصلح.

هيي فعلاً “الصحافة رسالة”.

الجديد عرضت حلقة عن الفساد بلبنان فيها تحط نص المسؤولين بالحبس. قام اتّهمُن القاضي بيتر جرمانوس إنّن “عديمي الوطنية”.

جاري البحث عن مفهوم الوطنية لدى جرمانوس.


بالأخبار الفنية،

اليسا نزلت ع ساحة الشهدا وقالتلنا إنه ««it’s ok.

شربل خليل معتبر الثورة مؤامرة من المثليين للسيطرة عالدولة.

ميشال الفتريادس مصرّ إنه كل يلي بالطريق قوات زعران قطّاع طرق.

ويوسف الخال ساعة بينعي الثورة، ساعة بيعطي إرشادات لضمان نجاحها.

«- بطلبك هيدا بتكوني عم تدبحيني.
– ما تنسى انه انت يلي حملتني السكين»

(عن مصيرية استعمال السكين، من مسلسل لبناني رصين)


الاقتراح كفعلٍ سياسي

لكنّ «الاقتراح» قد يكون، في خروجه عن حدود الممكن، هو المطلوب اليوم: اقتراحات قد تفرز، واقتراحات قد تزعج، واقتراحات قد تنقلنا من لحظة «الثورة» الجامعة إلى لحظة الفرز السياسي…

من أزمة النظام إلى أزمة معارضيه

رسم حدود فاصلة بين قوى المعارضة نفسها النزعة الإصلاحية حركة إسقاط النظام الطائفي حصرها بقانون انتخابات جديد مالت لناحية حزب الله انعكست الانتخابات هزائم تتصدّر المشهد في ساحة رياض الصلح تأسيس جبهة سياسيّة مستقلّة متجانسة