جمعة ما حدا بيعرف

ما حدا بيعرف قديه رح يصير سعر صرف الليرة. مش عم بتكهّن. هيك قال حاكم مصرف لبنان. وما حدا بيعرف إذا تمّ تهريب أموال إلى الخارج، هيك قال رئيس جمعية المصارف. وما حدا بيعرف شو رح ينعمل للبدء بحلّ الأزمة، هيك فهمنا من اجتماع لجنة المال والموازنة. وما حدا بيعرف إذا رح يصير عنّا حكومة قريباً، مع إنه رئيس الجمهورية عباله “يعيّدنا” فيها. بس بالمقابل، منعرف إنه فتنا بمرحلة الإنهيار. المصارف كلّ ما إلها عم تقلّل خرجيتنا الأسبوعية، أسعار السلع زادت حوالي 50% وما في غير وديع الشيخ عم بيغنّي بلبنان ع راس السنة. ومع هيك، بعدن 500 كلمة.


حوالي 700 محامي زاروا السجون مع النقيب ملحم خلف للإطّلاع ع أوضاع السجنا وكيفية مساعدتهم.

ع أمل نسترد كلّ النقابات من جماعة السلطة لترجع تلعب دورها.

رفع زلمي فأس على موظف بنك لأن بدّه مصرياته وصار كذا مشكل بالمصارف ومنن تطوروا لضرب.

بس رئيس جمعية المصارف معتبر إنه هيدي “كريزة” ورح تخلص.

تمّ استدعاء الناشط ربيع الأمين على مكتب مكافحة جرائم المعلوماتية بناء على شكوى من صاحب بنك الموارد، مروان خير الدين.

بحياة مثالية، خير الدين مفروض يكون عم يتحقّق معه على العديد من فضائح القطاع.

نزلوا شبيبة تيار المستقبل عالأرض بعد تسمية حسان دياب لأن اعتبروا إنه «الطائفة بخطر».

بنفس الليلة، الحريري كان عم يوجّه تحية للثورة لأن تخطّت الخطاب الطائفي.

شتّت وعن جديد غرق لبنان.

بس هالمرة ما عذّب وزير الأشغال حاله بمؤتمر صحافي.

علي مرتضى: إذا بتشتغل الحكومة قد نص ما بيشتغل جبران، منصير بألف خير.

شربل خليل: اعطوني كلمة على وزن #ديما_قراطية.

ندى إندراوس عزيز: بدها تتركنا الثورة نعيّد مع عيلتنا ونروح على الكنيسة ع رواق؟

مجموعة أقوال مأثورة من الإعلام.

حسان دياب: غطائي أنني مستقلّ ولا أطلب شيئاً لنفسي.

ولا حتى كتاب عن انجازاتك كرئيس حكومة الانهيار؟

ميشال عون: لنفترض أن جبران باسيل هو من يشكّل الحكومة، ألا يحق له ذلك لأنه يترأس أكبر كتلة نيابية؟

هيدي السلطة صرلها 11 سنة بتألّف وبتعطّل حكومات «لعيون صهر الجنرال».

سعد الحريري: الحكومة المقبلة هي حكومة جبران باسيل.

الحريري خلال الانتخابات النيابية: الصوت التفضيلي سيكون لصديقي جبران باسيل.

مصادر عين التينة: برّي لا يتدخّل في تأليف الحكومة.

بس المسا، زار الخليلين حسان دياب للبحث بالتشكيلة الحكومية.

جبران باسيل: هذه ليست حكومة حزب الله بل حكومة جميع اللبنانيين.

قصده بـ«جميع اللبنانيين» تكتّل لبنان القوي وفانزاته.

كتلة الوفاء للمقاومة: ننظر بقلق وريبة إلى مظاهر التلوّث البيئي للمياه اللبنانية.

خليكن عم تنظروا. الليطاني ونهر الغدير بعد بيحملوا وقت.

وليد جنبلاط: واصلين على مجاعة وأنا ما بيهمّني غير الجبل.

جنبلاط أكتر تقدمي اشتراكي عرفته الاشتراكية.

«ما بدي روق. مش عم بشحد أنا. بدي معاشي كلّه».

«بدّي مصرياتي. هيدا حقي وتعبي وما إلكن حق تحجزوه».

مجموعة أقوال مأثورة من المصارف.

رياض سلامة: بعد 17 تشرين لم أتكلّم مطلقاً عن الدولار.

مين بعد بيحكي فيه أصلا؟

المدير العام للجمارك بدري ضاهر: بحاجة إلى تغيير وإصلاح حقيقيين في مواجهة تحديات المستقبل.

عزيزي، أي إصلاح حقيقي ببلّش بمحاسبتك، غير هيك كلّه «رز بحليب».

«سقط ضلع من ضلوع الحقيقة. مشان هيك اخترت طريقة إنتقام من دون ما لوّث إيديي بدم حدا».

(طلعت الحقيقة عندها ضلع، من مسلسل لبناني رصين)